Ospiti non invitati: il cuculo
In realtât, la strategjie riprodutive dal cuc e je tant plui fine, e a son tancj e diferents i aspiets che a jentrin in zûc. Mi plasarès fevelâus di cheste storie parcè che, tra lis tantis dal mont naturâl, cheste e je une di chês che mi inmaghe di plui.
Il cuc al è calcolât l’unic uciel parasit di Europe, ancje se, par dî la veretât, metât de sô vite si davuelç intun altri continent (al è di fat un migradôr transsaharian).
I adults dal cuc a rivin ca di nô tal mês di Març. Si inacuarzìn in curt de lôr presince, pal cjant inconfondibil che ancje in chescj dîs al rivoche te nestre campagne.
I masclis a fasin sintî, dai puescj là che a son, il lôr “cu-cu”, ripetût di un continui, inte sperance di tirâ dongje une mascje di passaç. Fin chi, o disarês, dut inte norme. Al è dopo il cubiament che la storie e cjape une plee avonde inusuâl.
La femine e patulie il teritori no tant par cirî l’ingjâf perfet intun ramaç just par costruî il so nît, ma par cjatânt fûr un za pront e doprât di une altre specie (moratolon, moratule, scodaròs, petaròs, capineri e in maniere ecezionâl ancje cisile… in Italie si contin plui di cuarantecinc speciis che a subissin il parasitisim dal cuc).
A pene che la cubie che e je la legjitime proprietarie dal nît individuât si slontane, la mascje dal cuc si bute svelte sul nît. Mame cuc e fâs alore di buride un so ûf, gjavantint in cambi un dal nît ospit (cussì, in plui di no dismovi suspiets, e varà a disposizion une mirinde sostanziose) e e svole vie par cirî un altri nît di invadi, rivant a sabotânt fin a vincj.
O imagjini che i parons di cjase, cuant che a tornin dongje, a nasin che al è alc di iregolâr intal gnûf asset dal nît. Però il “cost” di abandonâ la clucide par tornâ a scomençânt une altre gnove ju fâs rimandâ, decidint di lâ indevant a curâ chê che a àn za. Un erôr grandonon, in tiermins di sucès riprodutîf!
Dopo dodis dîs, l’ûf suspiet si vierç e al ven fûr il piçul cuc, vuarp e cence plumis. Daurman, par istint, al scomence a fâsi spazi in cjase, cjariantsi su lis spalis i ûfs o i piçui fradilastris a pene nassûts e butantju di sot, fûr dal nît. Us pararà un compuartament avonde scoret, ma viodudis lis esigjencis alimentârs impuartantis dal piçul cuc, i fradis a saressin dut câs muarts di fam in curt. Par plui o mancul trê setemanis i gjenitôrs adotîfs a laran indenant e indaûr dal nît, provant a bonâ la fam seneose dal lôr strani poleçut, che za dopo pôc timp al varà dimensions tant plui grandis di chês dai gjenitôrs adotîfs. Par stimolâ di plui il lôr istint tal nudrî la fiolance, il piçul cuc al à un bec cetant grant che al ten simpri spalancât (al è un segnâl iresistibil, par un uciel neogjenitôr) e par completâ l’ingjan, il viers che al mande fûr al è fat di tons soreponûts, cussì al pâr che il sun al vegni di plui ucieluts intal stes moment.
Dopo dome dôs setemanis, il cuc al è masse grant pal nît e si trasferìs su la vegjetazion dongje, lant indevant però a pretindi atenzions. Passade ancjemò une setemane al sarà rivât ae indipendence e si prepararà a migrâ, za tal mês di Avost, in direzion de Afriche, lant daûr di un istint natîf che i segnarà la vie. I cucs zovins a tornaran ca di nô dome intal Març sucessîf. Al tornarà a partî alore un cicli gnûf, li che lis feminis a sielzaran di invadi cuasi in maniere esclusive i nîts de specie che di chê a son stâts arlevâts l’an prime.
In cheste storie al pâr che i puars ucieluts che a àn subît il parasitisim no vedin nissun sisteme di difese. In realtât, si à viodût che man a man che une specie e ven parasitade, cheste e disvilupe capacitâts plui grandis di individuâ lis magladuris dai siei ûfs rispiet a chei dal cuc, eliminant o abandonant il nît atacât. Lis feminis di cuc, di bande lôr, a fasin deventâ, di gjenerazion in gjenerazion, i lôr ûfs une vore plui simii di chei di chês speciis che di istint a son puartadis a parasitâ (il gjen che al determine il colôr dai ûfs al è determinât in maniere esclusive dal cromosome sessuâl passât par mieç de mari). No lu fasin in maniere cussiente, ma al è clâr che i ûfs cun plui someance a saran ricognossûts cun plui dificoltât de specie parasitade, e duncje cence savê a vignaran selezionâts cucs simpri brâfs intal ingjan.
Chest conflit al condure di an in an e al sucêt propit devant dai nestris voi, se o volìn cjalâlu!
Par cui che al volès dâ une cjalade plui di dongje, us sugjerìs chest filmât: https://www.youtube.com/watch?v=SO1WccH2_YM. La nature no finìs mai di maraveâ!
