Cinquemila problemi e un paio di soluzioni
Se il frêt dal Invier mi fâs vignî voie di involuçâmi sul divan a pene che il soreli al va a mont, lis gnots di Istât invezit mi àn simpri incantesemade. No pe movida intai locâi, ma pluitost par vie che dut intal mont naturâl al pâr che al cjapi une gnove vite. Tant che intune flabe estive, dulà che i zuiatui cuant che e sune miezegnot a scomencin a danzâ e a cjantâ, ancje il palc dal nestri zardin si anime di atôrs inspietâts, a pene che si alce il sipari sul cîl stelât.
Intune des mês escursions vie pe gnot tal zardin, cualchi dì indaûr, o ai par esempli finalmentri viodût cui miei voi i doi protagoniscj dai scuintris cjantarins che si contindin il gno piçul sfuei: doi masclis di ‘save smeraldine (Bufotes viridis) che – un di une bande e un di chê altre di un ring acuatic – ses “davin jù” a colps di craçoladis. Cul aument de umiditât, la sere, tal mieç de jerbe taiade in mût scrupulôs, a vegnin fûr ancje i viers, une des predis preferidis di chescj anfibis. Par rivâ a mangjâju, lis ‘savis a plein il cjâf in bande, ju gafin cu la bocje e dopo, cuntune espression che e pâr cuasi di riviel, a glotin la bocjade sierant i voi: al è curiôs cemût che par chescj animâi al sedi indispensabil tirâ i muscui oculârs par rivâ a gloti.
Tra i piçui ospits che mi è sucedût di cjatâ in passât, e che cun grande probabilitât a frecuentin ancje cjase vuestre, chel che mancul mi spietavi al è stât il riç european (Erinaceus europaeus). Lu ai cjatât une gnot intant che al jere impegnât a mangjâ lis crochetis dai gjats intal curtîl, cjalât cun disdegn, ma a distance, ancje dal proprietari legjitim de scudiele. Mi è vignût iniment cussì di contâ alc di chest strani animâl, che al vîf une vore dongje di nô e che al è cetant curiôs intal aspiet e intal compuartament.
Cuant che lu ai viodût pe prime volte, nol jere tant interessât de mê presince. Dome dopo un pôc, sintintsi osservât cun insistence, al à capît che al jere il câs di mandâ un messaç: si è involuçât sù come che al ves vût di dî “Di po tu, âstu alc cuintri di me? Ca nol è nuie ce viodi!”. Inte tradizion popolâr il riç nol è calcolât un animâl cetant svelt, ma un aforisim di Archiloco al dîs cussì “La bolp a ‘nt sa tantis, il riç dome une, ma impuartante!”. Il riferiment al è ae lôr strategjie eficace di difese: se i riçs si sintin menaçâts, par istint si inglimucin contraìnt intal stes timp la muscoladure dorsâl, di mût di dreçâ i aseis e di presentâ un scût fat di plui di cinc mil spinis, che a son in realtât pêi modificâts. I riçs a puedin restâ in cheste posizion par tant timp, fin cuant che a stimin che il pericul al sedi passât. La strategjie e je simpri vincidore devant di un pussibil predadôr (il riç nol à, magari cussì no, ancjetante fortune cu lis machinis, ma al è l’unic sisteme di difese che al cognòs). Cheste arme di difese une vore dure e à ancje i siei aspiets negatîfs. Par esempli, pai riçs al è impussibil gratâsi, e par chest i parasits ju puedin tacâ cun facilitât. No stin a fevelâ po dopo dai problemis leâts al mont dal eros… Pal riç mascli puartâ insom une serade a cortizâ une mascje al è un probleme pardabon “intrigôs”. Par fortune, la mascje che e cêt aes avances e mostre la sô disponibilitât slungjant lis gjambis posteriôrs par indaûr, in mût che i aseis si sbassin e a ridusin il pericul di fâi mâl al mascli. Chest, di bande sô, al cjape lis justis precauzions: al è dotât, cun di fat, di un vêt estensibil che i permet une union sessuâl a distance di sigurece. Se il cubiament al à vût sucès, il moment dal part al varès di fâur pôre aes maris riç plui di cualsisedi altre specie, ma la evoluzion e à fat in maniere che i piçui a sedin cence aseis, tal moment de nassite. Se ancje voaltris o volessis vê un riç tal zardin no stait a provâ a cjapânt un, a son animâi che a sielzin il lôr teritori, se ju movessis si sintaressin in dificoltât e straneâts inte gnove sede e dal sigûr a rivaressin a scjampâ. Se o vês pazience, a rivaran li di volatris in maniere spontanie (o forsit za a son), atrats de mangjative dai gjats, tant che intal gno câs, o di zonis cun cisis tant plenis di insets e di ruiis. Tal câs che o vedis une cente di rêt, no stait a preocupâsi, a son scjaladôrs abii, a rivin a rimpinâsi cun agjilitât estreme e se, intal vignî jù, ur ves di mancjâ la prese, a son bogns di colâ cun classe, rivant a fâsi sù par moderâ il colp. A son animâi resistents, si nudrissin ancje di aliments che par altris animâi a saressin tossics, ma a son une vore vulnerabii ai prodots chimics che o doprìn tes nestris cjasis par copâ i lacais, che di chei a son predadôrs straordenaris. Mi racomandi: nuie lat, se us vegnin a cjatâ. Al è un aliment cetant tossic par lôr, tant che par tancj altris animâi! Po dopo, stant che a son besteutis che a van in letarc, o podês insiorâ il vuestri spazi vert lassant, cuant che e rive la stagjon frede, cualchi tasse di lens e di fueis secjis; a saran preseadis une vore tant che cove pal lôr pisul invernâl.
