Bolp di curtîl

autôr Manuela Rossi
date 4 Avost 2017

La setemane passade, aprofitant des bielis seradis ancjemò di lûs che cheste stagjon nus regale, si jere li a fevelâ fûr di cjase; i gjats dal curtîl a jerin stravuacâts panze par aiar, cence pudôr, par provâ a cirî un tic di fresc, e i grîs a intonavin cun fadie cualchi note sclendare tal scjafoiaç.

Dut al someave ordenari cuant che si sin inacuarts che al jere cualchidun altri a partecipâ al simposi: sentade suntun muret, a cualchi desene di metris, e nus cjalave une bolpute. Chest nus à maraveât une vore. Figurìnsi cuant che dopo ancje jê, tant che i gjats, e à scomençât a rodolâsi trancuile, par dopo tornâ a cjapâ la sô strade e talpetâ vie bande i cjamps, cun naturalece. O sai che lis bolps a puedin cjapâ ancje tante confidence) cul timp, ma cheste e jere la prime volte che le viodevin… In realtât, dopo o ai pensât che cuissà di cetant timp, cence che o savessin, e bacigave tor lis scudielis dal mangjâ dai gjatons ben passûts... L'avistament di bolps (forsit e jere simpri la stesse) de bande di altris abitants dal vicinât, intai dîs daspò, al à creât un ciert davoi. Di dulà vegnino lis bolps? Stano aumentant?? E dopo al è stât come simpri cui che al è vignût fûr cu la solite fanfaronade: “Lis àno puartadis i forestâi/i animaliscj” (mi domandi: forsit par ridusi il numar des surîs che a jerin stadis diliberadis l'an prime par nudrî lis liparis butadis jù dai elicotars doi agns prime?!).

Ma dopo, tropis sono lis bolps sul nestri teritori? Cu la precision che mi caraterize o rispuindarès: tantis!

In realtât, no lu sa nissun cun precision. A son stadis fatis stimis fondadis su osservazions no standardizadis (stant che i coscj par un studi detaiât a son une vore alts). O podaressin dî che la bolp e je simpri, ma no si viôt cuasi mai. I indizis de sô presince a puedin jessi lis olmis sul pantan (ma se si cjale di corse si puedin confondi cun chês dal cjan), i escrements lassâts sul troi in puescj evidents tant che segn di marcadure dal teritori, il viers un pôc lugubri che si sint intes gnots di Invier te stagjon dai amôrs (pai apassionâts di peraulis crosadis ae Bartezzaghi, il viers de bolp si dîs par talian “gannito”) o la presince des covis.

La bolp rosse (Vulpes vulpes) e je un animâl cun mil risorsis: tant che i oms e lis surîs, e à savût cjatâ sistemis par sorevivi intai contescj plui svariâts, des monts incontaminadis aes discjariis suburbanis. Chest i à fat vuadagnâ la innomine di jessi scaltre, ma l'adietîf pardabon plui just par jê al sarès “adatabile”. La bolp e je pardabon il carnivar plui difondût tal mont (in chest, al à metût la man l'om che le à espuartade ancje in Australie pe cjace ricreative, dulà che dopo si è difondude e cumò e je daûr a causâ la estinzion di tantis speciis locâls). Ancje se e je classificade intal grup dai carnivars, e je une onivare a 360 grâts: si nudrìs di uciei, micromamifars, retii, ûfs, pomis... in sumis, di dut ce che e cjate di comestibil. Cuant che e je bondance di mangjative e je in stât di creâ dispensis, soterant ce che e à in plui, che al vignarà doprât intai periodis di scjarsetât di risorsis. Pûr jessint un animâl solitari e teritoriâl, lis situazions di sorebondance alimentâr artificiâl (discjariis, imissions periodichis e massivis di salvadi pe cjace) a ‘nt fasin cressi la concentrazion locâl.

In cundizions normâls i piçui, nassûts te Vierte, a rivin ae indipendence dilunc dal Istât e a scomencin a dispierdisi cirint un teritori par lôr cont (la bolpute che o vin viodût chê altre sere e jere cun dute probabilitât une di chestis). Tant che ducj i zovins, i piçui a son un pôc “cjaviestris” e al è plui facil che a sedin lôr a svicinâsi di plui aes cjasis par cirî mangjative, cun grant fastidi dai parons di poleçs e di cunins. La vite, par chescj zovenuts no je però cussì facile e la mortalitât dentri dal prin an di vite e je une vore alte par vie de mancjance di mangjative, dai incidents cu lis machinis e, magari cussì no, dai vergognôs invelenaments ilegâi.

Il rapuart di cheste specie cul om al è stât simpri conflituâl. Par cui che al à vude une incursion di chest animâl, o crôt che ce che al fâs rabiâ di plui al sedi il surpus killing, o sedi il copâ plui predis di chês che i coventin, fin che a fasin fûr dutis lis gjalinis dal gjalinâr. O vês di savê che chest compuartament nol è inspirât di tristerie native, ma dal so istint. Chest i dîs: “Fâs scorte cumò che tu puedis, dal doman no je ciertece!”. Forsit però no in tancj a san che a son indicazions ben precisis pe costruzion di “gjalinârs a prove di bolp” e che lis spesis pal adeguament a puedin jessi finanziadis (Art. 10 Leç Regjonâl n. 6 dai 6 di Març dal 2008). No vin di dismenteâsi però che la bolp e à un rûl ecologjic fondamentâl, prin di dut intal contigniment dai roseadôrs (intun an, chest canide a ‘nt pues eliminâ di sîs a dodis mil), intant che il probleme des scorsadis intai gjalinârs al è un avigniment invezit dal dut ocasionâl. Par contignî il numar di bolps a nivei normâi, e baste cualchi precauzion: ridusi lis fonts di mangjative che o furnìn ancje cence savê (i gjats panzons dal curtîl a son stâts metûts in rie cu la diete, de setemane passade), centâ gjalinârs e discjariis e evitâ imissions massivis di animâi “pronts di cjaçâ” (chescj esemplârs, arlevâts tant che animâi di curtîl, a àn di fat pôc istint antipredatori e a son bocjadis facilis par cualsisedi bolp cuntun pocje di buse tal stomi).

Il conflit de bolp cul om al à però altris musis, no ultin il fat che chest animâl al sedi achì di nô il serbatori naturâl pal virus de rabie.  Par gno cont, cheste e je la malatie che e dismôf in me la psicosi plui grande. Al sarà stât il cine Cujo, gjavât dal romanç di Stephen King, o la leture adolessenziâl di un libri di Wilbur Smith dulà che un dai protagoniscj al murive di cheste malatie dopo di une descrizion orende dal decors, o ancjemò prime l'intervent aes elementârs di un funzionari che nus informave, cun tiermins alarmistics, de epidemie che e jere in chê volte. No lu sai, ma dal sigûr e je une malatie che e fâs pôre.

La rabie e je provocade di un virus (Lyssavirus) che al pues colpî ducj i mamifars, ancje l’om, e magari cussì no, e puarte ae muart. In Friûl e jere sparide cul 1995, ma cul 2008 une gnove ondade, rivade de Slovenie, e à fat segnâ gnûfs câs. Prin di dut, a jessi colpidis a son lis bolps, e fûr di dubi la difusion de malatie e je leade ae densitât di chescj animâi sul teritori. Chest al podarès fâ pensâ che plans di abatiment a podaressin ridusi il pericul di infezion, ma in realtât al è stât dimostrât che chest gjenar di intervent, in plui che ineficaç, al à ancje dal dut contrari e che, anzit, la difusion de rabie e cres a magle di vueli. Il mecanisim al è leât a strent ae biologjie de specie: la mancjance di individuis residents al à tant che consecuence un numar plui alt di jentradis des areis limitrofis di esemplârs che a cirin teritoris lassâts libars; se al sucêt in areis che a confinin cun zonis dulà che la malatie e je presinte, chest al acelere une vore la difusion de rabie. In realtât, l'unic mecanisim pardabon zovevul e testât al è chel di une campagne massive di vacine par vie orâl (cun bocjadis di pueste) propit des stessis bolps che a vivin in chescj teritoris di confin. La presince di une popolazion sane e vacinade, a une densitât prossime a chê massime in nature e fasarà, par dî cussì, di “stropul” ae jentrade di individuis malâts. Insume, ancje in chest câs, chê che in aparence e pâr une azion fuarte e salde detade dal prin impuls, no à i efiets volûts. Studiâ la biologjie di une specie nol è, cemût che dispès si à viodût, dome un passetimp di “int stravagante”, ma alc che al à des consecuencis su la vite di ducj.

Par gno cont, jessint une note ipocondriache (o cemût che al disarès un gno student, “une un pôc…condriache”), no pues dineâ che intai dîs dopo dal avistament de bolpute o ai tignût sot voli il compuartament dai miei gjats par viodi se a vevin i sintoms de rabie. Tornant a pensâ a chel avistament speciâl però, a son di plui i sintiments positîfs, leâts al vê podût viodi un animâl salvadi (comun sì, ma une vore elusîf) cussì di dongje.