Gno fradi, il salvadi

autôr Manuela Rossi
date 14 Lui 2017

Cualchi dì indaûr, intant che o fevelavi cun mê sûr, jê mi à fate une domande: “Ma il gjat salvadi, esistial?”. A pensâi ben, no crôt che la cussience de realtât di chest animâl e sedi cussì pandude. Tantis voltis o pensi che al puedi soreponisi ae imagjin di un gjat “vagabont” o “insalvadeît”. E pûr, chest animâl enigmatic al è reâl, ancje se pardabon pôcs di lôr a puedin dî di vêlu viodût.

Il gjat salvadi european (Felis silvestris silvestris) al è une specie dal dut solitarie. I siei unics moments di socialitât a son leâts al periodi riprodutîf e, intal câs des mascjis, cuant che a stan daûr ai lôr piçui. Il so caratar elusîf e la sô basse densitât tai teritoris che al ocupe in nature (stimade intun adult ogni 10 chilometris cuadrâts), a ‘nt fasin la vere fantasime dai nestris boscs. In Italie si cjate cuntune cierte continuitât dilunc di dut l'Apenin, fin a rivâ in Calabrie, cuntune popolazion presinte ancje in Sicilie. La situazion des Alps e je invezit plui framentade: la uniche popolazion stabile che e gjolt di une buine vitalitât e je propit chê dal Friûl-Vignesie Julie. Dai teritoris plui di mont tant che chei des Alps e des Prealps Juliis e Cjargnelis, al à cjapât areis culinârs (la sô presince e je sigure ancje intal Glemonàs), fin al Cjars gurizan e triestin. Il so tornâ al è stât favorît dal sigûr dal aument, intai ultins decenis, de superficie forestâl par vie dal abandon, in chestis areis, di gran part de ativitât agricule e di chê dal arlevament.

Distingui chest gjaton salvadi dal nestri gjat dumiesti nol è però cussì facil. I caratars distintîfs principâi a son il pêl tigrât, une code cu la ponte nere a forme di mace, cuntune serie variabile tra 2 e 4 anei neris su la part terminâl e une striche nere dorsâl che si ferme, a colp, prime che e scomenci la code. Ma la uniche ciertece sul so jessi salvadi nus e da la gjenetiche, parcè che in realtât il tui di cjase e cheste fantasime dai boscs a son ad in plen la stesse specie, ancje se il caratar e la personalitât a son avonde diviers (a àn scomençât a diferenziâsi miârs di agns indaûr, cuant che lis speciis om e gjat a àn vût il prin contat).

Prime di contâ di chest incuintri magjic che al à robât i cûrs di tancj umans (prin di dut, il gno), o volarès fâ un pôc di ordin tassonomic. La specie Felis silvestris e je uniche ma in dì di vuê si distinguin cinc sotspeciis di gjats salvadis che a diferissin tra di lôr prin di dut pal cuarp e pes abitudins, risultât dal adatament aes diviersis cundizions ambientâls là che a vivin. Une e je Felis silvestris silvestris, il gjat salvadi dai nestris boscs, cul cuarp bocon, usât a un clime avonde frêt. Dopo o vin Felis silvestris lybica, sotspecie che si cjate in Nordafriche e in Medi Orient, plui longjilinie e di dimensions plui piçulis, adate par un clime cjalt. Infin, altris trê sotspeciis, distribuidis in trê areâi: Asie Centrâl (Felis silvestris ornata), Afriche Subsahariane (Felis silvestris cafra) e Cine (Felis silvestris bieti). Di chestis, dome la sotspecie lybica e je stade ae fin “dumiesteade” dal om. A diference dal lôf, il caratar dal dut solitari dal gjat salvadi al determine la mancjance di ogni forme jerarchiche di struture sociâl intal so mût di agjî, e par chest al è un candidât dificil al dumiesteament. Cemût puedial jessi alore che propit cumò, intant che o scrîf, o ai un felin che al continue a freolâsi su la mê muse e a talpetâ su la tastiere dal computer?

La testemoneance plui antighe dal leam tra om e gjat e je stade cjatade intune tombe a Shillurokambos, te isule di Cipri, e e je di 9.000 agns indaûr. Inte tombe al è stât cjatât un om sepulît cun in bande il so gjat, a testemoneance che il procès di dumiesteament al veve di jessi ancjemò precedent. Studis resints (1) basâts su provis gjenetichis, morfologjichis e archeologjichis, a son rivâts a delineâ cun plui esatece la storie dal dumiesteament dal gjat e de sô difusion. Cuant che, 12.000 agns indaûr, lis popolazions nomadis si son insedadis in maniere stabile inte aree de mieze lune fertile, in graciis de scuvierte de agriculture a àn scomençât a imagazenâ deradis alimentârs. La consecuence direte di chest cumulament e je stade un aument locâl dai roseadôrs, che a fasevin fraie, in libertât, di un granâr a di chel altri. La grande concentrazion di surîs e à atirât la atenzion dai gjats salvadis de aree (Felis silvestris lybica). I prins esemplârs che si son svicinâts a son stâts dal sigûr chei mancul difidents e spaurîts cul om e ancje chei plui pronts a sopuartâ altris individuis de stesse specie tai contors. Chest fat al à determinade une reâl selezion positive di chescj caratars, parcè che la bondance di predis e jere cussì grande di favorî i esemplârs che a vevin fate cheste sielte e che, cubiantsi tra di lôr, a passavin chest caratar aes gnovis gjenerazions. L'om, in principi dome testemoni sodisfat di cheste rivade, al à scomençât cul timp a favorî l'intervent fortunât dai felins, e cussì al à condizionât cierts lôr aspiets comportamentâi. Une ricercje sul gjenome dal gjat dumiesti (2) e à evidenziât che cierts gjens di chest ultin a diferissin in efiets dal gjat salvadi, in mût particolâr chei leâts ae memorie, al aprendiment su la associazion stimul e ricompense, e al control de pôre condizionade, che intal complès a àn determinât tal gjat dumiesti un compuartament plui mugnestri. Cierts compuartaments dal nestri tui di cjase, di fat, no son par nuie tipics di chel salvadi: un tra ducj, il sgnaulâ. Par un animâl solitari, la vocalizazion no covente, e al limit e je prerogative esclusive dai piçui che a comunichin cu la mari. Intal gjat dumiesti invezit, chest caratar al reste ancje di adult e al è doprât in maniere esclusive par comunicâ cul om. Cierts etolics lu definissin tant che un mimetisim sonôr: a pensin di fat che il sgnauleç, simil al vaî di un neonât, nus provochi une reazion incondizionade che nus puarte a sodisfâ, il plui des voltis, lis domandis alimentârs dal nestri amì pelosut (a pensâi ben mi sint manipolade, ma cun me al funzione simpri!).

Tornant ae nestre storie, dal Egjit e dal Medi Orient i gjats a son rivâts in Europe midiant dai Fenicis che a àn scomençât a comerciâju par cjapâ lis surîs. In Grecie, prime che a rivassin i gjats, pal control dai roseadôrs si dopravin pal plui mustelidis (pudìs blancs e bilitis). Cui Romans, i gjats si son slargjâts su dut il teritori dal Imperi e a àn scomençât a jessi calcolâts ancje tant che animâi di compagnie. Di li, la espansion no si è plui fermade, tant che cumò a son presints in ducj i continents, fûr che in Antartide.

Ma pal gjat dumiesti nol è stât simpri dut facil. Dilunc de Ete di Mieç, inte Europe Cristiane, al è stât demonizât e associât ae sfortune e al mâl. Si pensave che al fos il compagn dal diaul e des striis, tant che ancje lui al vignive brusât vîf. Si pense che il câl de popolazion dumiestie in cheste epoche e sedi stade une des concausis des epidemiis di peste, dal moment che l'agjent patogjen di cheste malatie al è veicolât dai pulçs des pantianis che in chei agns a son proliferadis, cence i lôr nemîs proverbiâi. Si varà di spietâ il Romanticisim par une reâl rivalutazion di chest felin.

Intant che, dilunc dai secui, il tui dumiesti al gjoldeve di alts e bas, il gjat salvadi european al è stât simpri calcolât nocîf e cjaçât pe sô piel. Lis dôs sotspeciis si son di tant in tant incrosadis, e ancjemò al pues sucedi. In cualchi part di Europe, la percentuâl di ibridazion tra il salvadi e il dumiesti e je impuartante, intant che in Friûl invezit e somee ancjemò pôc frecuente. Un dai problemis di conservazion dal gjat salvadi al è apont la ibridazion, e ancje par chest al è impuartant limitâ al massim il fenomen dai gjats bandonâts. In aparence, e somee pôc impuartante la pussibilitât che si incrosin doi individuis che in fin dai conts a son de stesse specie, ma il cûr de cuistion al è propit in chês piçulis diferencis comportamentâls e soredut morfologjichis che a dividin il dumiesti dal salvadi. La taie, la colorazion e il caratar dal gjat salvadi european a ‘nt fasin un predadôr ecelent, adatât dal dut al so ambient naturâl. I ibrits a varan dal sigûr mantei verglemâts che ju fasaran mancul mimetics denant des lôr predis, un cuarp plui magri che ju fasarà mancul bogns di resisti al clime frêt invernâl, e cun di plui a varan un caratar diviers che cence dubi al condizionarà la lôr capacitât di sorevivence. La jentrade di chescj gjens intune popolazion salvadie, duncje, e finirà par indebilîle. A dut chest si à di zontâ ancje la menace reâl che e ven de difusion di cualchi patologjie une vore frecuente intal gjat dumiesti (tant che HIV e leucemie feline) e une vore pericolose pe popolazion salvadie.

O crôt che cui che pardabon al ame i gjats e al reste inmagât ogni dì dai lôr moviments e de lôr bielece sinuose, al vedi a cûr ancje la lôr storie magnifiche e la conservazion in nature dal parint salvadi. Par gno cont, savê che a cualchi chilometri dal “gno” Zorro al è il so omolic salvadi, impegnât tal arlevâ i siei piçui o che al è in vuaite par cjapâ un surisin, mal fâs viodi tant che un animâl ancjemò plui misteriôs.

1Ottoni at al.,The palaeogenetics of cat dispersal in the ancient world, Nature Ecology & Evolution, n°139 Jugn dal 2017.

2Montague M.J. et al., Comparative analysis of the domestic cat genome reveals genetic signatures underlying feline biology and domestication, Proceedings of the National Academy of Sciences, vol. 111 n° 48 Dicembar dal 2014