Cui che o sin

Über uns

casaChê di Bordan e je la Cjase des Paveis plui grande in Italie. E je componude di trê grandis sidreris climatizadis (par un totâl di 1000 metri cuadris), là che a vivin animâi e plantis di trê ecosistemis tropicâi specifics: la Amazonie, lis forestis pluviâls asiatichis e la jungle africane. In ogni sidrere a svolin libaris un miâr di paveis di centenârs di speciis diviersis, e che a vegnin dai paîs tropicâi di dut il planet.

 

In plui des sidreris o inmaneìn mostris spetacolârs sui temis de evoluzion, de sostignibilitât, des strategjiis animâls e vegjetâls. Ogni an o proponìn almancul une gnove mostre.

 

A completin la ufierte laboratoris e locâi dedicâts ae didatiche, une sale multimediâl, une buteghe dedicade, une cafetarie (vierte dome tai dîs festîfs o su prenotazion).

 

La Cjase des Paveis e je vierte dal 2003 e e je di proprietât dal Comun di Bordan. E je gjestide de cooperative Farfalle nella testa, che e sta daûr in autonomie a ducj i aspiets, dal progjet sientific, aes preparazions, ae comunicazion.

 

Farfalle nella testa e je nassude tal 2013 cu la idee di meti adun, dentri di un contignidôr unic, diviersis professionalitâts trasversâls tal cjamp de divulgazion sientifiche, in particolâr pal setôr naturalistic. Sienziâts, ricercjadôrs, educadôrs, comunicadôrs, tecnics che di tancj agns si interessin di consulence, di progjetazion e gjestion par museus, di centris sientifics e zardins zoologjics, a àn decidût di lavorâ insiemi par rivâ a puartâ al public une esperience complete, coerente, fuarte, che e rivi tal stes timp ae emotivitât, al cûr, al cjâf.