Ativitât scuelis

Lis paveis a scuele

Cressi lis paveis cul Macakit

Âstu mai cjalade une ruie intant che e mangje? Âstu mai viodude di dongje une crisalide? Lu sâstu che arlevâ une pavee al è tant plui facil che viodi di un pes ros? Danus acet te tô classe e ti mostrarìn cemût fâ cressi une crisalide e po dopo nassi une pavee macaon, par lassâle in fin libare. Par ultin, ti spietìn a Bordan, par rispuindi a dutis lis tôs tantis domandis e par viodi lis centenârs di speciis intes nestris sidreris.

Un planet di paveis

Il zîr dal mont intune ore e pôc di plui

Prime di jessi simiis o sin stâts retii, e prime inmò pes. Lant denantdaûr dal nestri arbul gjenealogjic, prime o dopo o cjatarìn un antenât antîc di indulà che a àn vude origjin ancje lis paveis. O condividìn cun lôr une buine part de nestre storie e tancj aspiets de nestre esistence. Cognossi miôr lis paveis al vûl dî cognossi miôr ancje cualchi part di nô stes.

La vite straordenarie di Rosa e Emilio

Rosa la mariposa e Emilio il papilio nus contaran cemût che e nas, che e cres e che e vîf une pavee, la lungje spiete e lis tantis trasformazions prime di deventâ adults. Stant daûr de conte animade, o rivarìn a cognossi cualchidun dai segrets platâts tal mont straordenari dai insets, capintint la ricjece e la complessitât. E ae fin, ducj tes sidreris a viodi dal vîf il svol des paveis!

Vuê o jeri une pavee

Cjalâ il mont di une prospetive gnove

Metìnsi tal puest di un inset e imagjinìn cemût che e podarès jessi la nestre vite: ce mangjìno e cemût? Cemût comunichìno? Cemût cirìno un compagn? O capirìn che la vite di un inset no je po tant semplice e nancje banâl. Po dopo o jentrarìn tes sidreris, par osservâ lis paveis in svol e par confrontâ cu la realtât chel che si sin imagjinâts e contâts.

Loco moto

Il mont mat dai animâi in moviment

Salte tant che un zupet, moviti tant che un vier di tiere, cjamine tant che un ragn, un centpîts, une ruie, un coleotar! Prime o osservarìn insiemi cemût che a son fats e cemût che si movin, che a saltucin, che a sbalcin, che a strissin, e che a rodolin insets e altris piçui animâi. Po dopo si metarìn tal lôr puest e o cirarìn di imitâju zuiant.

La vite segrete des plantis

Viaç dentri e ator des plantis

Ancje se nol somee, lis plantis no stan mai fermis. Si dan pardabon cetant da fâ! O rivarìn a capî cemût che e je la vite di une plante: cemût che e rive a “mangjâ”, cemût che e fâs a riprodusisi, cemût che e rive a colonizâ gnûfs spazis, cualis strategjiis che e dopre par difindisi dai siei nemîs.